Səfər çərçivəsində bir sıra sosial və infrastruktur layihələrinin açılışı həyata keçirilib, yeni yaşayış komplekslərinin təməlləri qoyulub və doğma yurda qayıdan sakinlərlə görüş keçirilib. Prezident İlham Əliyev Kəlbəcər sakinləri ilə görüşdə çıxış edərək bu günü Azərbaycan xalqının tarixi qələbələrinin davamı kimi dəyərləndirib: “Əziz kəlbəcərlilər, Kəlbəcərə xoş gəlmisiniz! Bu gün sizin həyatınızda tarixi bir gündür. Doğma Vətənə, doğma şəhərə 32 ildən sonra qayıdırsınız və bu münasibətlə sizi ürəkdən təbrik edirəm. Biz ədaləti bərpa etdik, haqqımızı bərpa etdik.”
Prezident qeyd edib ki, artıq şəhərdə müasir infrastruktur yaradılıb, yeni yaşayış komplekslərinin inşası davam etdirilir və gələcəkdə on mindən çox kəlbəcərli öz doğma yurduna qayıdacaq. Ölkə başçısı çıxışında Kəlbəcərin 1993-cü ildə işğalının həm strateji, həm də mənəvi baxımdan Azərbaycan üçün böyük itki olduğunu vurğulayıb. O, ovaxtkı hakimiyyətin xəyanətkar siyasətinə diqqət çəkərək qeyd edib ki, məhz bu səbəbdən torpaqlarımız uzun illər düşmən tapdağı altında qalıb: “Əfsuslar olsun ki, ovaxtkı Azərbaycan rəhbərliyi xəyanətkarlıq və satqınlıq siyasəti apararaq doğma diyarımızı qoruya bilməmişdir. Kəlbəcərin işğalı strateji baxımdan ölkəmiz üçün böyük problemlər yaratmışdır.”
Prezident İlham Əliyev vurğulayıb ki, 44 günlük Vətən müharibəsi və ardınca keçirilən antiterror əməliyyatı nəticəsində Azərbaycan xalqı öz ərazi bütövlüyünü tam bərpa edib:
“Azərbaycan dövləti və Azərbaycan xalqı bir yumruq kimi birləşdi və biz Ermənistanı cəmi 44 gün ərzində kapitulyasiya aktını imzalamağa məcbur etdik. 2023-cü ilin 19-20 sentyabrı da 8 noyabr qədər şərəfli və tarixi günlərdir. Biz o günlərdə ölkəmizin tam suverenliyini təmin etdik.” Kəlbəcərdə həyata keçirilən genişmiqyaslı bərpa və quruculuq işləri barədə danışan dövlət başçısı bildirib ki, bir vaxtlar viran qoyulmuş şəhər bu gün müasir və abad yaşayış məkanına çevrilir: “Onlar bütün şəhər və kəndlərimizi viran qoyublar. Amma biz qurub-yaratmışıq. İndi Kəlbəcər şəhəri dünyanın ən gözəl mənzərəli şəhərlərindən birinə çevrilir. Siz burada rahat yaşayacaqsınız və buna tam layiqsiniz.”
Prezident həmçinin yeni məktəblərin, sosial obyektlərin, parkların və yaşayış komplekslərinin inşasının sürətlə davam etdiyini, enerji və nəqliyyat layihələrinin uğurla həyata keçirildiyini vurğulayıb. Prezident İlham Əliyev çıxışında Ermənistanla sülh müqaviləsinin imzalanmasının Azərbaycanın maraqlarına uyğun olduğunu qeyd edib:
“Ermənistanla sülh müqaviləsinin müəllifi də bizik. Bu sənəd Azərbaycanın tarixi uğurudur. Artıq Naxçıvanla quru bağlantısı da təmin olunub və yaxın gələcəkdə Azərbaycan qatarlarla və avtomobillərlə Naxçıvana birbaşa çıxış əldə edəcək.”
Səfər zamanı Prezident İlham Əliyev Kəlbəcərin Vəng kəndində “Aşağı Vəng”, “Nadirxanlı” və “Çaykənd” kiçik su elektrik stansiyalarının, “Balland-Kəlbəcər balı, arı və arıçılıq məhsulları mağazası”nın açılışında iştirak edib. Şəhərdə üçüncü və dördüncü yaşayış komplekslərinin, eləcə də Kəlbəcər şəhər parkının təməlləri qoyulub.
Çıxışını yekunlaşdıran Prezident İlham Əliyev Azərbaycan xalqının gücünə və birliyinə diqqət çəkib: “Biz düşməndən qisasımızı döyüş meydanında aldıq. Biz bir daha xalqımızın böyüklüyünü göstərdik. İndi isə işimiz quruculuqdur. Biz müzəffər xalq və qalib dövlət kimi yaşayacağıq.”
