Marketlərdəki kassalarda koronavirusa yoluxa bilərsiniz – XƏBƏRDARLIQ

Koronavirus pandemiyası ilə bağlı təhlükənin mövcud olduğu bu günlərdə hər bir vətəndaş ictimai nəzarətçi qismində çıxış etməlidir.

Bunu Lent.az-a açıqlamasında Azad İstehlakçılar Birliyinin sədri Eyyub Hüseynov deyib.
Mağazalarda, müxtəlif xidmət sahələrində gigiyenik qaydalara əməl olunmasına, qoyulan normaların pozulmamasına yalnız dövlətin nəzarət etməsinin mümkünsüz olduğunu deyən AİB sədri bu məsələlərdə ictimai qınaq amilinin önə çıxmasının vacibliyini vurğulayıb: “Mağazalarda gigiyenik tələblərə əməl olunması kimi məsələlərlə bağlı inzibati nəzarət tədbirləri həyata keçirilmir. Nazirlər Kabineti yanında Operativ Qərargahın tapşırıqlarına uyğun hərəkət etmək hər bir xidmət göstərənə elan olunub, onlar da buna uyğun tədbirlər həyata keçirirlər. Bu prosesdə ictimai qınağın böyük rolu olmalıdır. İnsanlar özləri diqqətli olmaqla yanaşı, biznes qurumlarını da normaları yerinə yetirməyə məcbur etməlidirlər”.

AİB sədri mağaza və marketlərdəki problemlərə də toxunub: “Mağazalarda kassada oturanların əksəriyyəti əlcəklə işləyirlər. Eyni əlcəklə insanların kartını, pulunu alırlar, məhsulları kassaya vururlar və s. Əgər koronavirusun yayılması açıqlandığı şəkildədirsə, o zaman kassadakı vəziyyət insanlara bir-birindən koronavirus ötürmək üçün şərait yaradır. Bu cür problem yol polislərində də var idi. Bütün sürücülərin sənədlərinə eyni əlcəklə baxılırdı. Baş Dövlət Yol Polisi İdarəsinin ictimaiyyətlə əlaqələr şöbəsinin rəisi Kamran Əliyevlə əlaqə saxladıq, bu vəziyyət 80 faiz ortadan qaldırılıb”.

AİB sədri qeyd edib ki, qonşu Gürcüstanda pulu müəyyən bir temperaturdan keçirdikdən sonra müştəriyə qaytarırlar: “Sosial məsafənin saxlanılması vacibdir. Dükan rəhbərliyi öndə olmalıdır və qayda-qanuna əməl olunmasına nəzarət etməlidir. İctimai nəzarət meydana çıxmalıdır. Hər bir insan ictimai nəzarətçi qismində çıxış etməlidir. Məsələn, Almaniyada daha çox da yaşlı insanlar qaydala pozuntusu halına rast gəldikdə polisə xəbər, irad tuturlar. Qeyd etdiyim kimi, bunların hamısına dövlət nəzarət edə bilməz”.